نوکیا پاکستان میں نیٹ ورک لگائےگا
پاکستان میں موبائل فون استعمال کرنے والوں کی تعداد تیس لاکھ سے زیادہ ہے
موبائل فون بنانے والی کمپنی ’نوکیا‘ پاکستان میں جی ایس ایم فون نیٹ ورک قائم کرے گی۔نوکیا کا کہنا ہے کہ اس نے ٹیلی نور پاکستان پرائیویٹ لمیٹڈ کے ساتھ تین سال کے معاہدے پر دستخط کیے ہیں۔
اس معاہدے کے مطابق نوکیا ملک میں جی ایس ایم نیٹورک قائم کرکے اس کو چلائے گا۔ ابتدائی مرحلے میں یہ مرکزی اور شمالی پنجاب میں ہوگا اور اگلے سال سے شروع ہو جائے گا۔
اس معاہدے کی مالی تفصیلات نہیں بتائی گئی ہیں تاہم ماہرین کا کہنا ہے کہ اس کی لاگت سو ملین یورو یعنی ساڑھے دس کروڑ امریکی ڈالر سے زیادہ ہوگی۔
نوکیا دنیا کی سب سے بڑی موبائل فون کمپنی ہے اور اس کا تعلق فِنلینڈ سے ہے جہاں کا دورہ پاکستانی صدر جنرل پرویز مشرف نے حال میں کیا تھا۔
ٹیلی نور ناروے کی کمپنی کا حصہ ہے اور اپریل میں اس نے پاکستان میں پندرہ سالہ جی ایس ایم لائسنس حاصل کیا تھا۔
نوکیا جی ایس ایم لگانے اور چلانے کا کام ٹیلی نور کے لیے کرے گی۔
ٹیلی نور کے مطابق پاکستان میں موبائل فون استعمال کرنے والوں کی تعداد تیس لاکھ سے زیادہ ہے۔
کُل آبادی کے لحاظ سے پاکستان دنیا میں چھٹے نمبر پر ہے۔ ٹیلی نور کو یہ ذمہ داری سونپی گئی ہے کہ وہ چار سال کے اندر ملک میں ایسا نیٹ ورک لگا دے جس سے ملک کے زیادہ تر بڑے شہر شامل ہوں۔